Deri në 3 mijë euro do jetë gjoba për barnatoret që nuk mbajnë kujdestarinë e përcaktuar me rotacion, ndërsa 1 mijë euro për personat fizik.

Kështu ka bërë të ditur Drejtoria e Shëndetësisë në Kryeqytet, raportona Arbresh.info.

Me rregulloren e re të miratuar nga Komuna e Prishtinë, 10 barnatore të kryeqytetit do të mbajnë kujdestari të plotë duke filluar nga muaji Tetor.

Nga drejtoria e Shëndetësisë në Komunën e Prishtinës për Arbresh.info, thonë se janë të hapur për shtimin e numrit të barnatoreve kujdestare.

Në përgjigjen e Drejtorisë së Shëndetësisë për mosrespektimin e orarit, i cili do të përpilohet nga Oda e Farmacistëve të Kosovës, do të ketë gjobë deri në 1 mijë euro për personat fizik dhe deri në 3 mijë për ata juridik.

“Barnatoret që do të mbajnë kujdestaritë do të përcaktohen me rotacion. Orari përgatitet nga Oda e Farmacistëve të Kosovës për një periudhë një vjeçare nga dita e miratimit të rregullores. Gjobat për mos përmbajtje të orarit të përcaktuar me rregullore që janë paraparë: 300-1.000 euro për persona fizik si dhe 1.000-3.000 euro për persona jurdik.”, thuhet në përgjigjen e tyre.

Sipas tyre numri i paracaktuar është i mjaftueshëm, por ekziston mundësia edhe e shtimit të barnatoreve kujdestare nëse është e nevojshme.

“Mendojmë që për me fillu është i mjaftueshëm, pasi që ky numër është përcaktuar në koordinim me farmacistët të cilët e njohin punën në terren dhe kapacitetet e barnatoreve. Por në koordinim me barnatore nëse e shohim të nevojshme me e shtu numrin e barnatoreve kujdestare, ne jemi të hapur për me bashkëpunua në të mirë të qytetarit.”, kanë thënë nga Drejtoria e Shëndetësisë në Prishtinë.

Ndërkaq, nga kjo drejtori bëjnë të ditur se kujdestaria e barnatoreve do të jetë me rotacion, pra, secila prej tyre do të ketë mundësinë e kujdestarisë.

“Nuk do të jenë çdoherë të njëjtat barnatore kujdestare, patjetër që do të jenë me rotacion, pra secila barnatore do e ketë mundësinë për të kujdestaruar në mënyrë të barabartë”, thonë nga kjo drejtori.

Ndryshe, në Komunën e Prishtinës, deri tani nuk ka pasur barnatore të cilat kanë funksionuar 24 orë dhe të cilat janë caktuar nga komuna.

Në fillim të muajit shtator Kuvendi Komunal i Prishtinës me shumicë votash ka miratuar ndryshim-plotësimin e rregullores për fillimin dhe mbarimin e orarit të punës së organizatave të biznesit në kryeqytet.

Sipas njoftimit, në këtë ndryshim sqarohet se nga tetori, në 5 barnatore të kryeqytetit do të ketë kujdestari me orar të plotë (24 orë).

“Orari i kujdestarisë së natës për barnatore është prej orës 21:00 deri në 07:00, kujdestarojnë 5 (pesë) barnatore në gjithë kryeqytetin. Gjobiten me nga 300 deri në 1000 euro personi fizik dhe nga 1000 deri në 3000 euro personi juridik, nëse nuk i përmbahen orarit të përcaktuar. Orari i barnatoreve kujdestare do të publikohet së shpejti”, thuhej në njoftim.

“Të dielave dhe gjatë festave do të punojnë 10 barnatore kujdestare me orar 24h”, thuhej tutje në njoftim./Arbresh.info/Erolinda Gashi/